Software á medida en Vigo

A área de Vigo concentra unha parte enorme da industria galega: a automoción arredor da planta de Stellantis en Balaídos e os seus provedores, a transformación do mar e as conserveiras, os estaleiros, o granito do Porriño e unha rede loxística que xira arredor do porto e dos polígonos da Zona Franca. Son empresas con procesos moi específicos e, a miúdo, con sistemas que non se falan entre si.

O patrón repítese: un ERP de mercado que cobre a contabilidade e a facturación e, arredor, un mar de follas de Excel, partes en papel e correos para todo o demais — quendas, fichaxes, incidencias, trazabilidade, pedidos de clientes profesionais. O software á medida non substitúe necesariamente ese ERP; moitas veces rodéao e aliméntao.

Tamén traballamos con empresas de servizos — formación, náutica, clubs — que creceron ata o punto de que a xestión lles come o día. Autoescuela GTI é un bo exemplo: necesitaba un ERP propio porque ningún programa xenérico entendía como se organizan as súas prácticas, os seus exames e a súa flota.

A pregunta honesta non é cal é mellor, senón que parte do teu negocio é diferente. Para contabilidade, nóminas ou facturación hai programas estándar excelentes e sería absurdo reinventalos. O software á medida compensa na parte que te distingue ou que ningún produto resolve ben: a túa forma de planificar, de producir, de atender ou de medir.

Por iso moitas solucións á medida conviven cun ERP de mercado: cobren o oco e intégranse con el, en lugar de substituílo todo de golpe. É máis barato, máis rápido de pór en marcha e menos arriscado.

Un ERP á medida, ou programa de xestión á medida, é o sistema co que unha empresa leva o seu día a día escrito arredor de como traballa, en lugar dunha ferramenta estándar á que se adapta. Desenvolvémolo en Vigo, co mesmo equipo que despois o mantén, e plantexámolo por módulos para que o primeiro entre en uso canto antes.

O noso caso de referencia é Autoescuela GTI. A súa secretaría necesitaba xestionar matrículas e administración; o profesorado, rexistrar prácticas e resultados de exame desde o propio sistema; e a autoescola, levar a xestión completa da súa flota de coches de prácticas. Resolvémolo cun ERP para a oficina conectado a unha app móbil onde os alumnos consultan as súas próximas prácticas, as súas clases pasadas e os seus exames.

O resultado: a xestión da autoescola quedou dixitalizada de punta a punta e os trámites que alumnos e profesores resolven sen pasar por secretaría multiplicáronse por 10.

Un CRM é onde unha empresa garda a quen lle vende, que se falou con cada cliente e en que punto está cada oportunidade. Os CRM de mercado cobren ben o habitual —contactos, un funil de vendas, recordatorios— e para moitas empresas son a opción correcta: contrátanse e comézanse a usar sen construír nada.

Un CRM á medida compensa cando a túa forma de vender non encaixa no funil estándar, ou cando os datos que importan nacen noutros sitios —a túa web, os teus formularios, o teu ERP, as túas campañas— e alguén ten que copialos a man. Entón o CRM constrúese arredor do teu proceso e conéctase co que xa empregas. Se non é o teu caso, dicímosllo: non fai falta un CRM propio para gardar contactos.

Facemos CRM á medida para clientes e para nós. Para Fase Service Partner, empresa de instalacións eléctricas navais e industriais de Vigo e Marín, desenvolvemos o seu CRM, ademais da súa web corporativa. E o que mellor che podemos ensinar por dentro é o noso: ActionERP e o seu panel de leads. Os leads dos formularios da web e dos formularios de Meta Ads entran nun mesmo funil, con aviso ao momento ao equipo, seguimento ata que o lead se gaña ou se perde e exportación das conversións a Google Ads, para que as campañas saiban que leads acaban sendo clientes.

O noso propio programa de xestión tamén é á medida. ActionERP é o sistema co que Action Development leva a empresa enteira: clientes e funil comercial, propostas, proxectos, tarefas e horas dedicadas, fichaxe e ausencias do equipo, facturación, gastos e informes, tickets de soporte, bolsas de horas, documentos con sinatura electrónica e un portal para que cada cliente consulte o seu.

Construímolo co mesmo método que lles propoñemos aos nosos clientes: por módulos, empezando polo que máis tempo nos quitaba, e co cumprimento legal dentro desde o principio. O rexistro de xornada non se pode modificar a posteriori e a facturación está preparada para Verifactu. Por iso, cando nos pides un programa de xestión, non che falamos de teoría: usámolo cada día.

Desenvolvemos chatbots e asistentes con intelixencia artificial para empresas, en WhatsApp, na web ou dentro dunha app. Por exemplo, un asistente que atende os clientes fóra de horario e recolle a súa petición, outro que informa do estado dun pedido ou dunha reparación consultando o teu programa de xestión, ou un interno que responde ao equipo cos procedementos e a documentación da empresa.

A diferenza cun chatbot de modelo está no que hai detrás: o asistente consulta e rexistra datos nos teus sistemas, como o teu ERP, o teu CRM ou a túa axenda, en lugar de repetir respostas fixas. E cando non sabe algo, pasa a conversa a unha persoa con todo o contexto.

Antes de poñelo en marcha deixamos por escrito que pode contestar e que non, con que información e que datos persoais trata, e probámolo con preguntas reais. A IA ocúpase do repetitivo; as decisións seguen sendo do teu equipo.

O risco clásico do software á medida é o proxecto eterno: o alcance medra, as datas móvense e ninguén sabe que queda. Evitámolo dividindo o sistema en módulos que entran en uso por separado. O primeiro resolve o problema que máis doe e úsase de verdade; os seguintes deséñanse co aprendido.

Ademais, traballamos cos usuarios reais, non só con dirección. Quen ficha, quen énchese o parte ou quen atende o mostrador é quen decide se unha ferramenta se adopta ou se abandona, así que proban o sistema desde as primeiras entregas.

E deixamos por escrito o modelo de datos, as integracións e as decisións técnicas importantes, para que o sistema non dependa da memoria de ninguén.